ឆៃលីដាឡែនពិសោធន៍ឃើញថាក្បាលខ្មែរភាគច្រើនមានខួរស្អុយរលួយមួយចំហៀងធំ 20/12/2011
Posted by ស្រុកខ្មែរ ស្នេហ៍ខ្ញុំ in តារាភាពយន្តអាស៊ី, ទស្សនៈ, ព័ត៌មានជាតិ.Tags: ខួរស្អុយ, ឆៃលីដាឡែន, តារាភាពយន្ដខ្មែរ, ទស្សនៈ, ប្រទេសកម្ពុជា, សិចស៊ី, Cambodia
99 comments
ដីខ្មែរបាត់ជាបន្តបន្ទាប់នៅតាមព្រំដែន បឹងទន្លេសាបឡើងល្អក់ទឹកពុល ដោយសារយួនរស់នៅលើ គ្រប់ខេត្តក្រុង និង តំបន់សំខាន់ៗយួនមករស់នៅខុសច្បាប់ រកស៊ីប្រមូលលុយខ្មែរធ្វើអ្នកមានពាសពេញ ប្រជាជនខ្មែរក្រីក្រត្រូវគេប្លន់ដីផ្ទះសម្បែងវាយ ទាត់ ធាក់ ចាប់ដាក់គុក ដឹងហើយថាគ្រប់ស្ថាប័នរដ្ឋសព្វថ្ងៃពុករលួយ តែនៅតែអោនក្បាលតត្រុកយកលុយទៅអោយគេ ហើយថែមទាំងអរគុណគេទៀតថាចិត្តល្អ ឃើញហើយថាពួកបំផ្លាញជាតិកាប់ព្រៃឈើខ្មែរ យកលុយដាក់ហោប៉ៅរៀងៗខ្លួន ឃើញហើយកម្មកររោងចក្រត្រូវរស់នៅវេទនារកស៊ីញ៉ាំមិនគ្រប់ មកធ្វើការដួលសន្លប់រាប់រយនាក់ ឃើញហើយថៅកែចិនប្រើប៉ូលិស ទាហានខ្មែរវាយអ្នកតវ៉ាបែកក្បាលហូរឈាម។
ខ្មែរគ្រប់គ្នាសុទ្ធតែដឹង ឃើញរឿងអស់នេះគ្រប់គ្នា តែខ្មែរទាំងឡាយនោះដែលមានក្បាលតែខួរស្អុយមិនចេះនិយាយ មិនចេះឈឺឆ្អាលអីទេ ទាំងប្រជាជន និស្សិត បញ្ញវន្ត អាជ្ញាធរទទួលខុសត្រូវថែរក្សាប្រជាជន សំងំលាក់ក្បាលស្ងាត់ច្រៀប “មិនទៅនាំទុក្ខដាក់ខ្លួនឥតប្រយោជន៍” តែបើគ្រាន់តែឃើញកញ្ញា ឆៃលីដាឡែន ស្លៀកខោអាវស៊ិចស៊ីរាំលើឆាកប៉ុណ្ណឹងម្នាក់ៗតាំងប្រកាច់ប្រកិនឆោឡោពេញសារព័ត៌មាន ពេញហ្វេសប៊ុក បានពាក្យ បានសម្ដី វោហារសព្ទណាស់ ប្រឹងប្រែងណាស់ ប្រឹងទៅ ប្រឹងអាខាងអញ្ចឹងអោយខ្លាំងទៅអស់លោក រក្សាទៅតែសីលធម៌មួយមុខហ្នឹងនោះ រឿងផ្សេងៗដែលសំខាន់ចំពោះមុខរាល់ថ្ងៃកុំគិត។ សូមជម្រាបពួកក្រុមខួរមិនសូវកើត ខាងរឿងមានប្រយោជន៍ថា បើបាត់បង់ដី បាត់បង់ប្រទេសជាតិហើយ ស្អីក៏មិនសល់ដែរកុំថាឡើយសីលធម៌ ប្រពៃណីប៉ុណ្ណឹងនោះ ស្រុកខ្មែរទាំងមូលនឹងរលាយ។
“សំបូរណាស់ស្រុកយើងពួកមានតែក្បាលតែខួរស្អុយរលួយមួយចំហៀងធំ”
Related articles
- បច្ចេកវិទ្យា៖ ពង្រីក អក្សរ ខ្មែរ យូនីកូដ ក្នុង Skype (varychin.com)
- កំប្លែង រូបភាព៖ Aung San Suu Kyi – Hillary Clinton (varychin.com)
- បច្ចេកវិទ្យា៖ អ្នក អាច ធ្វើ អោយ ស្រុក ខ្មែរ ធ្លាក់ ព្រិល បាន (varychin.com)
ទស្សនៈ “អ្នកមិននិយាយក៏គេមិនថាអ្នកឯងគរដែរ” 14/12/2011
Posted by ស្រុកខ្មែរ ស្នេហ៍ខ្ញុំ in ទស្សនៈ, ព័ត៌មានជាតិ, អ្នកលេងសំដី.Tags: ទស្សនៈ, នាយករដ្ឋមន្ត្រីខ្មែរ, ល្ងង់ខ្លៅ, ហ៊ុន សែន, The Phnom Penh Post
add a comment
ពាក្យអង់គ្លេសមួយឃ្លា ដែលខ្ញុំតែងតែលើកឡើងមកនិយាយ សំដៅលើលោកនាយករដ្ឋមន្ត្រីខ្មែរគឺ “Better to keep the mouth shut and let people think you are maybe an idiot rather than to open up your mouth to prove that you are really really an idiot” បើពាក្យមួយឃ្លារបស់ខ្មែរនិយាយថា “ទោះបីជាអ្នកឯងមិននិយាយក៏គេមិនគិតថាអ្នកឯងជាមនុស្សគរដែរ”។
Related articles
- Trafficked men return home…Hun Sen win-win policy sold out citizens to slave foreigners (khamerlogue.wordpress.com)
- Wallpapers៖ Christmas’s Wallpapers (varychin.com)
- ជជែក៖ តើ អ្នក គិត យ៉ាង ណា ដែរ អំពី ច្បាប់ នេះ? (varychin.com)
ទស្សនៈ “ពួកចង្រៃរស់បានយូរ” 24/11/2011
Posted by ស្រុកខ្មែរ ស្នេហ៍ខ្ញុំ in ទស្សនៈ, ព័ត៌មានជាតិ.Tags: ខៀវ សំផន, ខ្មែរក្រហម, ចាស់ៗ, ទស្សនៈ, នួន ជា, ប៉ុល ពត, ពួកចាស់គំរូអាក្រក់, សង្គម, អៀង សារី, អៀត ធារិទ្ធិ
12 comments
ករណី ០០២ ក្នុងសាលាក្ដីខ្មែរក្រហមចាប់ផ្ដើមដំណើរការហើយ វាពិតជាពិបាកទ្រាំមើល និង ស្ដាប់មេខ្មែរក្រហមប៉ុន្មានក្បាលហ្នឹង ប្រឹងស្រែកដោះសា មិនទទួលខុសត្រូវនូវការកាប់សំលាប់ប្រជាជនខ្មែរអស់ចំនួនរាប់លាននាក់មែនទែន។ លោក នួន ជា និយាយមិនព្រមទទួលសារភាព មិនទទួលខុសត្រូវថាខ្លួនហ្នឹង វាមានបាតដៃប្រឡាក់ឈាមប៉ុណ្ណោះទេ ថែមទាំងចង់បង្ហាញថាគាត់ជា “វីរបុរស” ទៅវិញ ថាកុំតែដោយសារមានរបបខ្មែរក្រហម ម្ល៉េះទឹកដីកម្ពុជាធ្លាក់ក្នុងកណ្ដាប់ដៃយួនបាត់ទៅហើយ។
ស្ដាប់ទៅដូចជាពីរោះបន្តិចដែរ តែយើងចង់សួរពួកមេដឹកនាំខ្មែរក្រហមប៉ុន្មានក្បាល ហ្នឹងថា តើការដែលពួកគេការពារមិនអោយទឹកដីខ្មែរធ្លាក់ក្នុងកណ្ដាប់ដៃយួន តែបែរជាមកកាប់សំលាប់ប្រជាជនខ្លួនឯងអស់ ២ លាននាក់ និង បំផ្លាញប្រទេសខ្លួនឯងមួយទាំងមូលហ្នឹង វាប្រសើរជាងមែនអី? បើចិត្តខ្ញុំវិញ ខ្ញុំសុខចិត្តដាក់ឈ្មោះទីក្រុងភ្នំពេញជាទីក្រុងហូជីមិញទីពីរ តែខ្ញុំមិនសុខចិត្តសំលាប់ប្រជាជនខ្លួនឯងពីរលាននាក់ ដោយកណ្ដាប់ដៃខ្លួនឯងអញ្ចឹងទេ។
វាដូចជារឿងហួសចិត្តមួយ ពាក្យសុំទោស ពាក្យទទួលខ្លួនថាខុស មិនលឺចេញស្ដីមួយម៉ាត់ បែរជាចង់បង្ហាញខ្លួនអោយគេទទួលស្គាល់ថាជា “វីរបុរស” ទៅវិញ។ ស្អប់ពួកចាស់ភ្លីភ្លើហ្នឹងមែនទែន នាំគំរូដ៏មហាសែនកខ្វក់សំរាប់ពួកក្មេងៗជំនាន់ក្រោយយើងនេះ ព្រោះដោយសារតែពួកចាស់ៗល្ងីល្ងើ អស់ហ្នឹងហើយ បានជាពួកយើងជំនាន់ក្រោយនេះម្នាក់ៗមហាសែនលំបាកវេទនា សព្វថ្ងៃនេះនោះ “ពួកចាស់ចង្រៃអស់ហ្នឹងរស់បានយូរទៀតណាស់”។
Related articles
- នឹង មាន ការ ហោះហើរ ដោយ ផ្ទាល់ អូស្ត្រាលី – កម្ពុជា (varychin.com)
- សុខភាព៖ ឈាម សិប្បនិមិត្ត ត្រូវ បាន គេ ផលិត បាន ហើយ (varychin.com)
- ជជែក៖ ហេតុអ្វី ត្រូវ បោះឆ្នោត អោយ គណបក្ស សម រង្ស៊ី? (varychin.com)
លោកតំណាងរាស្ត្រដល់ត្រើយសើយគូទ 03/11/2011
Posted by ស្រុកខ្មែរ ស្នេហ៍ខ្ញុំ in ទស្សនៈ, ព័ត៌មានជាតិ.Tags: ខេត្តក្រចេះ, តំណាងរាស្ត្រ, ទស្សនៈ, ប្រយោជន៍
add a comment
កាលពីឆ្នាំ ១៩៩៣ ប្រទេសកម្ពុជាបោះឆ្នោតលើកដំបូង ដែលមើលខុសត្រូវដោយអង្គការសហប្រជាជាតិ “អ៊ុនតាក់” នៅឆ្នាំនោះប្រជាជនអន្ទះអន្ទែងមែនទែន ចង់ទៅបោះឆ្នោត ព្រោះវាជាលើកទីមួយសំរាប់ពួកគេ វារំជើបរំជួលចិត្តតែម្ដង តែសំរាប់ខ្ញុំបោះអត់ទាន់បានទេ ព្រោះមិនទាន់គ្រប់អាយុ។ នៅកាលនោះតំណាងរាស្ត្រមកពីខាងគណបក្ស ហ្វុនស៊ិនប៉ិច ម្នាក់ៗមិនសូវសំបូរលុយកាក់អីទេ ដូច្នេះពួកគេម្នាក់ៗចុះមកធ្វើតំណាងរាស្ត្រកាលនោះ រកតែកង់ជិះ បាយញ៉ាំ មិនបានផង ដោយឃើញការលំបាកបែបនេះ ញាតិមិត្តរបស់ខ្ញុំមួយគ្រួសារបានជួយទំនុកបម្រុងលុយកាក់ ម្ហូបអាហារដល់តំណាងរាស្ត្រម្នាក់នោះ ដោយគាត់អាចមកសំរាក ញ៉ាំបាយនៅផ្ទះនោះបាន។ កាលនោះពួកគេដូចជាស្និទ្ធស្នាលនឹងគ្នាខ្លាំងណាស់ ស្អិតល្មួតនឹងគ្នាដែលពាក្យខ្មែរយើងថា “ចាក់ទឹកមិនលិច” ពួកគេស្និទ្ធស្នាលបែបនោះយូរក្រែលដែរទម្រាំដល់ពេលបោះឆ្នោត។
ស្រាប់តែពេលបោះឆ្នោតហើយខាងគណបក្ស ហ៊្វុនស៊ិនប៉ិច ឈ្នះ ញាតិរបស់ខ្ញុំមួយគ្រួសារនោះមហាសែនសប្បាយចិត្ត ដូចត្រូវឆ្នោតជាតិបានរាប់លានដុល្លារអញ្ចឹង ព្រោះតែមនុស្សដែលស្និតនឹងគាត់នោះ នឹងឡើងទៅជាចៅហ្វាយខេត្តហើយ។ ដល់ពេលមួយរយៈពេលក្រោយមក ស្ដាប់ពាក្យសំដីរបស់ញាតិខ្ញុំមួយគ្រួសារនោះ ហាក់ដូចជាមិនស៊ីចង្វាក់នឹងលោកតំណាងរាស្ត្រទៀតទេ និយាយអោយចំពាក្យខ្មែរថា “និយាយដើមគ្នាឡើងហុយដី” ព្រោះតែលោកតំណាងរាស្ត្រ មិនអាចតម្រូវតាមសំណូមពរមួយចំនួនរបស់ញាតិខ្ញុំមួយគ្រួសារនោះ ដោយពួកគេរំពឹងថាបើគណបក្ស ហ៊្វុនស៊ិនប៉ិច ឈ្នះឆ្នោតពួកគេមួយគ្រួសារនេះលែងស្គាល់ក្រហើយ ពួកគេនឹងឡើងជាអ្នកធំ ជាប្រធានមន្ទីរគ្រប់គ្នា តែក្ដីស្រមៃគ្រាន់តែជាក្ដីស្រមៃ។
សរុបសេចក្ដីទៅញាតិរបស់ខ្ញុំមួយគ្រួសារនោះ អោយអង្ករមួយតៅ ចង់បានមកវិញស្រូវមួយជង្រុក តាមពិតពួកគាត់អោយបាយញ៉ាំដោយសម្លឹងឃើញប្រយោជន៍តែប៉ុណ្ណោះ “ហុតទឹកសម្លឹងកាក ដកច្រវាក្រាកសម្លឹងត្រើយ” ពួកគេនិយាយថាលោកតំណាងរាស្ត្រ “ដល់ត្រើយសើយគូទ” ពួកគេថាលោកតំណាងរាស្ត្របោកប្រាស់ពួកគេ តែតាមគំនិតខ្ញុំវិញគិតថាពួកទាំងពីរខាង “សុទ្ធតែពួកបោក”។ លោកតំណាងរាស្ត្របោកយកបាយញ៉ាំ ដោយសន្យាផ្សេងៗ តែញាតិខ្ញុំមួយគ្រួសារចង់ប្រើប្រាស់លោកតំណាងរាស្ត្រដើម្បីធ្វើធំ និង សន្សំប្រយោជន៍ខ្លួនដូចគ្នា។ ទីបញ្ចប់យើងទាញបានសេចក្ដីសន្និដ្ឋានបានមួយថា ប្រទេសខ្មែរយើងមហាសែនអភ័ព្វ អ្នកនយោបាយក៏រកប្រយោជន៍ ប្រជារាស្ត្រក៏រកចំណេញ អញ្ចឹងអ្នកណាស្រលាញ់ជាតិ មាតុភូមិពិតប្រាកដទៅហ្ន៎?
Related articles
- ប្រពន្ធ មិន កេង នាំ គ្រោះ ថ្នាក់ ដល់ សុភមង្គល គ្រួសារ (varychin.com)
- រីករាយ ថ្ងៃ សំរាប់ លោក ឪពុក Father’s Day (varychin.com)
- សុខភាព៖ ឈាម សិប្បនិមិត្ត ត្រូវ បាន គេ ផលិត បាន ហើយ (varychin.com)
រឿងផ្ទាល់ខ្លួន៖ គ្មានសេចក្ដីសុខណា ស្មើនឹងសេចក្ដីស្ងប់ 24/09/2011
Posted by ស្រុកខ្មែរ ស្នេហ៍ខ្ញុំ in ទស្សនៈ, រឿងផ្ទាល់ខ្លួន.Tags: កុមារភាព, គ្មានសេចក្ដីសុខណា ស្មើនឹងសេចក្ដីស្ងប់, ចាស់ៗ, ទស្សនៈ, រឿងផ្ទាល់ខ្លួន
add a comment
កាលពីវ័យក្មេងចាស់ៗតែងតែស្ដីបន្ទោស និង វាយវាត់រូបខ្ញុំហើយប្រាប់ខ្ញុំថា “ហ្អែងនេះល្ងង់ណាស់” ចាស់ៗនៅទីនោះចូលចិត្តនិយាយពាក្យ “ហ្អែង ហង” ដាក់មនុស្សដែលមានវ័យក្មេងជាងពួកគាត់ ជាពិសេសនិយាយទៅកាន់ពួកក្មេងៗយើងតែម្ដង។ ពួកគាត់ស្ដីបន្ទោសចំណុចជាច្រើនថាខ្ញុំគឺជាក្មេងល្ងង់ម្នាក់ ពួកគាត់ចង់អោយខ្ញុំធ្វើតាមពួកគាត់ តែរហូតដល់ថ្ងៃនេះខ្ញុំជាមនុស្សធំពេញវ័យម្នាក់ ហើយខ្ញុំមើលឃើញយ៉ាងច្បាស់ថាចំណុច ដែលពួកគាត់និយាយថាខ្ញុំល្ងង់ “មិនត្រឹមត្រូវទេ” តាមការពិត “ខ្ញុំជាមនុស្សមានចិត្តស្អាតស្អំម្នាក់” ខ្ញុំជាមនុស្សម្នាក់ដែលមិនគិតប្រយោជន៍ខ្លួនតែមួយមុខ ខ្ញុំគិតក្រែងដល់ការលំបាករបស់អ្នកដទៃច្រើន និយាយអោយខ្លីជាមនុស្សមិនស្រវាវេច។
ខ្ញុំរីករាយនឹងខ្លួនខ្ញុំ ដែលមិនយកតម្រាប់តាមការប្រាប់របស់ពួកគាត់ ដូច្នេះបេះដូងរបស់ខ្ញុំថ្ងៃនេះសស្អាត មានពេលខ្លះខ្ញុំហាក់នឹកខឹងពួកគាត់ ថាហេតុអ្វីបានជាពួកគាត់ទូន្មានខ្ញុំអោយធ្វើជាមនុស្សបែបនោះ ពេលខ្លះខ្ញុំក៏អង្គុយនឹកដល់អំពើជាច្រើន ដែលពួកគាត់ប្រព្រឹត្តចំពោះញាតិមិត្ត អ្នកជិតខាងក្នុងភូមិ ដោយការពិចារណាលើរាល់សកម្មភាពទាំងនោះទើបខ្ញុំទាញបានសេចក្ដីសន្និដ្ឋានមួយថា នេះហើយជាមូលហេតុដែលធ្វើអោយសង្គមខ្មែរត្រូវ បែកប្រេះ បាត់បង់អស់សន្តិភាព សូម្បីតែសន្តិភាពក្នុងសមាគមដ៏មហាតូចមួយក្នុងភូមិ។
ពួកគាត់ជាមនុស្សដែលស្រលាញ់ “លុយ” គ្រប់ជំហានពួកគាត់គិតដល់ប្រយោជន៍ជាដំបូង ពួកគាត់មានលុយច្រើនជាងខ្ញុំឆ្ងាយ តែគ្រប់ពេលពួកគាត់តែងតែមានអារម្មណ៍ថា “ខ្វះខាត” ខ្ញុំអត់មានលុយច្រើនដូចពួកគាត់ទេ តែខ្ញុំមានអារម្មណ៍ថា “គ្រប់គ្រាន់” ព្រោះខ្ញុំមិនទាមទារច្រើនសំរាប់ជីវិតដូចពួកគាត់ទេ ដូចព្រះពុទ្ធសំដែងមកថា “គ្មានសេចក្ដីសុខណាស្មើនឹងសេចក្ដីស្ងប់”។ ពួកគាត់ប្រឹងប្រែងខ្លាំងណាស់ ដើម្បីប្រកួតប្រជែងគ្នាជាមួយអ្នកពួកគាត់ស្គាល់ ពួកគាត់ប្រឹងខ្លាចចាញ់គ្នា រហូតដល់ពួកគាត់ចាស់ជរារៀងៗខ្លួន តែពួកគាត់នៅតែរកសេចក្ដីឈ្នះមកដាក់ខ្លួនមិនបាន ហើយពួកគាត់នៅ តែព្រួយបារម្ភនៅខ្លាចចាញ់ដដែល តែពួកគាត់គិតមិនទាន់ឃើញទាល់តែសោះថាអ្វីដែលពួកគាត់ចាញ់គឺ “ភាពឈ្នានីស ភាពលោភលន់ ភាពមិនចេះស្កប់ស្កល់”។
មានតែខ្ញុំទេជាអ្នកឈ្នះព្រោះខ្ញុំមិនឈ្នានីស មិនលោភលន់ និង ស្កប់ស្កល់នឹងអ្វីដែលខ្ញុំមានសព្វថ្ងៃ។ ខ្ញុំតែងតែដើរដោយជើងខ្លួនឯង ហើយមិនតូចចិត្តទេ ខ្ញុំពេញចិត្តយ៉ាងបរិបូរណ៍តែម្ដង តែបើប្រៀបធៀបនឹងមនុស្សមួយចំនួន ដែលជិះឡានទំនើបដល់ទៅស៊េរី ២០១០ ពួកគេហាក់នៅតែមិនទាន់សប្បាយចិត្តដូចខ្ញុំទេ ព្រោះតែអ្នកដែលគាត់ស្គាល់ម្នាក់ទៀតជិះ ឡានស៊េរី ២០១១។ ខ្ញុំអត់មានអំណាចអ្វីបន្តិច សំរាប់គ្របដណ្ដប់លើអ្នកដទៃ ហើយខ្ញុំក៏អត់ប្រាថ្នាចង់បានដែរ តែខ្ញុំសប្បាយចិត្តជាងអស់លោកដែលមានផ្កាយមាស បួន ពាក់លើស្មា ហើយនៅមើលឃើញថាមានអ្នកពាក់ផ្កាយមាសលើស្មាដល់ទៅ ប្រាំ ហើយចង់បានដែរ។
អញ្ចឹងយើងចូលដល់បញ្ហានយោបាយស្រុកទេសវិញ យើងនិយាយអំពីការចង់ផ្លាស់ប្ដូរ អ្នកដឹកនាំប្រទេស ទាំងអ្នកប្រឆាំង អ្នកមិនប្រឆាំងចំមុខ តើពួកគេស្អប់ខ្ពើមការដឹកនាំដ៏កខ្វក់របស់រដ្ឋាភិបាលភ្នំពេញរាល់ថ្ងៃ? ឬមួយពួកគេគ្រាន់តែចង់បានអំណាច ផ្កាយមាសចំនួនដល់ទៅប្រាំ ពាក់លើស្មានឹងគេដែរ? នេះជាសំណួរដែលអស់លោកអ្នកនយោបាយត្រូវសួរខ្លួនឯងអោយច្បាស់ បើអស់លោកប្រាថ្នាចង់បានផ្កាយមាសប្រាំមកពាក់លើស្មា អញ្ចឹងមិនបាច់ផ្លាស់ប្ដូរអ្នកដឹកនាំអីទេ ព្រោះវានឹងគ្មានអ្វីខុសប្លែកពីការដឹកនាំរបស់លោក ហ៊ុន សែន សព្វថ្ងៃនេះទេ។៚
Related articles
- ប្រើ Evernote សំរាប់ អ្នក និយម សរសេរ អត្ថបទ (varychin.com)
- សុខភាព៖ ចំណី អាហារ ដែល ធ្វើ អោយ អ្នក នៅ ក្មេង (varychin.com)
- ចំណី ជីវិត៖ កែប្រែ ពិភពលោក (varychin.com)
កែវ រ៉េមី ព្រុសលែងស្គាល់ម្ចាស់ដើម 23/09/2011
Posted by ស្រុកខ្មែរ ស្នេហ៍ខ្ញុំ in ទស្សនៈ, ព័ត៌មានជាតិ, ព័ត៌មានដក់ស្រង់.Tags: កែវ រ៉េមី, គណបក្ស សម រង្ស៊ី, គណបក្សប្រជាជនកម្ពុជា, ឆ្កែពូកែព្រុស, ទស្សនៈ, ហ៊ុន សែន
4 comments
អ្នកដែលមិនស្គាល់ កែវ រ៉េមី ស្ដាប់ម្សៀហ្នឹងនិយាយមិនអីទេ តែអ្នកដែលគេធ្លាប់ស្គាល់គេហាក់ដូចជារអើមខ្លាំងណាស់ នៅពេលដែលឃើញម្សៀនេះ ម្ដងព្រុសផ្ទះនេះម្ដងព្រុសផ្ទះនោះ អ្នកណាក៏ដឹងថាម្សៀម្នាក់ហ្នឹងចេញពីប្រភពណាដែរ អ្នកដែលស្គាល់ច្រើនជាងគេគឺកម្មកររោងចក្រ ដែលធ្វើបាតុកម្មហើយម្សៀម្នាក់ហ្នឹងចេញមុខទៅជួយព្រុសដាក់លោក ហ៊ុន សែន នៅសហជីពនានា ពិសេសគឺនៅសហជីពសេរីកម្មករ ដែលជាសហជីពរបស់លោក ជា វិជ្ជារ ដែលត្រូវឃាតករបាញ់សំលាប់កណ្ដាលទីក្រុងភ្នំពេញប៉ុន្មានឆ្នាំកន្លងទៅ។
ដល់ស្រាប់តែមួយឆ្នាំកន្លងទៅស្រាប់តែអាម្សៀម្នាក់ហ្នឹងត្រូវលោក ហ៊ុន សែន ទិញយកទៅដាក់ផ្ទះគាត់បាត់ ព្រោះតែលោក ហ៊ុន សែន ដឹងថាម្សៀហ្នឹងជាពូជសត្វពូកែព្រុស សំរាប់អោយព្រុសដាក់គេគ្រប់គ្នា មិនតែប៉ុណ្ណោះម្សៀនេះ ព្រុសលែងស្គាល់ម្ចាស់ដើមទៀតផង គិតទៅគ្រាន់តែពូកែព្រុសក៏បានឡើងឋានៈ ជាមនុស្សពិសេស បានតំណែងខ្ពស់ ក្នុងជួរគណបក្សប្រជាជនកម្ពុជា ដែរហ្ន៎។
Related articles
- ចិន នឹង មាន ប្រលាន យន្តហោះ ធំ ជាង គេ លើ លោក ២០១៥ (varychin.com)
- ដំណាំ ផ្លែឈើ៖ ដើម និង ផ្លែ ស្រកា នាគ (varychin.com)
- ជួយ អ្នក ក្រីក្រ តាម អ៊ីនធឺណិត (varychin.com)
មេភ្លៀង មេខ្យល់នៃបដិវត្តន៍ថ្ងៃណាបានបង្ហាញកាយ? 20/09/2011
Posted by ស្រុកខ្មែរ ស្នេហ៍ខ្ញុំ in បដិវត្តន៍ផ្កាឈូក, ព័ត៌មានជាតិ.Tags: ទស្សនៈ, បដិវត្តន៍ផ្កាម្លិះ, បដិវត្តន៍ផ្កាឈូក, ពួកប្រេត, ហ៊ុន សែន, អសុរកាយ
add a comment
សំឡេងភ្លៀងធ្លាក់ប្រោះៗបណ្ដើរៗហើយ នៅចាំតែព្យុះបក់បន្ថែមបន្តិចប៉ុណ្ណោះ ភ្លៀងនឹងធ្លាក់ពាសពេញដីនៃប្រទេសកម្ពុជា នោះគឺភ្លៀងបដិវត្តន៍ បង្អុរដេញ លាងជម្រះពួកប្រេត ដែលកំពុងតែហុតឈាមស្រស់របស់ប្រជាជនខ្មែរទាំងកណ្ដាលថ្ងៃ ខ្យល់បក់មក បក់អោយខ្លាំង បក់អោយប៉ើងពួកត្មាត អសុរកាយ ដែលបន្លំខ្លួនថាជាព្រះជួយសង្គ្រោះ ដោយយកឈ្មោះថ្ងៃ ៧ មករា មកបិទបាំងបន្លំភ្នែក។
មេភ្លៀងនៅឯណា ម្ដេចមិនបង្ហាញកាយ? ចុះចំណែកមេខ្យល់ចាំដល់ណា ចាំទាល់តែគេហុតឈាម អង្កៀមឆ្អឹងប្រជាជនបងប្អូនយើងអស់ទើបចេញមុខ? ចេញមុខមក ចាំអីទៀត មកកញ្ជ្រោកបោកបាចបង្កើតជាសន្ទុះមួយ ដើម្បីអោយភ្លៀងបដិវត្តន៍អាចស្រោចស្រព ពាសពេញដែនបូរីនៃយើង ដែលជាដែនប្រទេសសំរាប់មនុស្សស្លូតត្រង់រស់នៅ។
ហេតុអ្វីក៏មានតែមេភ្លៀងមួយក្បាលគឺ សួង សោភ័ណ្ឌ? ហេតុអ្វីក៏អត់មាន សួង សោភ័ណ្ឌ មួយម៉ឺន មួយសែន មួយលាននាក់? មនុស្សចំនួន ១៤ លាននាក់មានតែ សួង សោភ័ណ្ឌ មានតែព្រះតេជព្រះគុណ លួន សាវ៉ាត តែប៉ុណ្ណឹងទេ? មានតែប៉ុណ្ណឹងទេមែនទេ? បើអ្នកទាំងអស់គ្នាមិនចេញមុខព្រមគ្នាទេ ពួកប្រេត អសុរកាយ នឹងខាំស៊ីអ្នកចេញមុខចំនួនប៉ុន្មានក្បាលនេះបានយ៉ាងងាយ ចេញអោយព្រមគ្នាទៅ នោះពួកប្រេតទាំងនោះមិនដឹងត្រូវខាំអ្នកណា ទុកអ្នកណាទេ។
Related articles
- ប្រើ Evernote សំរាប់ អ្នក និយម សរសេរ អត្ថបទ (varychin.com)
- ដំណាំ ផ្លែឈើ៖ ដើម និង ផ្លែ ស្រកា នាគ (varychin.com)
- Repost៖ ទេសចរណ៍ អវកាស ឆ្នាំ ២០១១ (varychin.com)
