jump to navigation

អារម្មណ៍នៃរដូវក្ដៅ 03/04/2018

Posted by ស្រុកខ្មែរ ស្នេហ៍ខ្ញុំ in រឿង​ផ្ទាល់​ខ្លួន, រឿង​ពិត.
add a comment

រៀងរាល់​ឆ្នាំ​នៅ​រដូវ​ក្ដៅ​ អារម្មណ៍មួយ​នោះ​លេច​ឡើង តែ​មិនដឹង​ថា​នោះ​ជា​អ្វី? វា​ហាក់​លំបាក​អធិប្បាយ​ប្រាប់មនុស្ស​ទូទៅ​ អាម្មណ៍មួួយ​នោះ​គ្រាន់​តែ​អោយ​ដឹង​ថា​ យើង​បាន​ជួប​ប្រទះ​កន្លង​មក​ហើយ​ ជួប​ប្រទះ​ច្រើន​ដង​ តាំង​ពី​បោះ​ជំហ៊ាន​ប៉ះ​លើ​ទឹកដី​នៃ​ប្រទេស​ស៊ុយអែត។ តាម​ពិត​ទៅ​ខ្លួន​យើង​ក៏​ត្រៀម​រួច​ស្រេច​ទៅ​ហើយ​ ថា​រឿង​នេះ​នឹង​កើត​ឡើង​ម្ដង​ទៀត​នា​រដូវ​ក្ដៅ​ឆ្នាំ​ ២០១៨​ វា​ចម្លែក​ពន់ពេក​នៅ​ពេល​ដែល​យើង​បាន​ជួប​វា​ ទទួល​ដឹង​ពី​វា​ច្រើន​ដង​ តែ​យើង​មិន​ដឹង​ថា​វា​នោះ​ជា​អ្វី? ជា​នរណា? ជា​ភាវៈអ្វី​អោយ​ប្រាកដ? មាន​រាងរៅ​បែប​ណា? កំពស់​ប៉ុណ្ណា? រឺ​ មួយ​វាគ្រាន់តែ​ជា​សតិ​មួយ​ដែល​យើង​មិន​ទាន់​បាន​បញ្ចប់​អោយ​បាន​ល្អ​ត្រឹមត្រូវ​ក្នុង​កាល​កន្លង? រឺ​ គ្រាន់​តែ​សតិ​មួយ​ជា​សញ្ញា​ថា​មាន​អ្វី​​នឹង​បម្រុង​កើត​នា​ពេល​ណាមួយ​ក្នុង​ថ្ងៃ​អនាគត? វដ្ដ​នៃ​មនោសញ្ចេតនា​ដ៏​ចំលែក​មួយ​នេះ​ ក៏​នឹង​វិល​មក​ដល់​វិញ​នៅ​ឆ្នាំ​ក្រោយ​ទៀត​ ពេល​ផ្ទៃ​មេឃ​មាន​ពន្លឺ​ភ្លឺ​ច្បាស់​ សីតុណ្ហភាព​ឡើង​កំដៅ​។ មនុស្ស​ជាច្រើន​នៅ​ទី​នេះ​ហាក់​ត្រេកត្រអាល​នឹង​រដូវ​ក្ដៅ​ ម្នាក់​ៗ​ដើរ​ចេញ​ក្រៅ​ ញ៉ាំ​ស្រាបៀរ​ ផឹក​កូកា​ សើច​ក្អាកក្អាយ​ អាំង​សាច់​ញ៉ាំ​កំសាន្ដ​ជាមួយ​មិត្តភក្ត្រ​ និង​ គ្រួសារ​​ តែ​មនុស្ស​ម្នាក់​នេះ​បែរ​ជា​ចង់​តែ​សំងំ​ត្រាំ​តែ​ក្នុង​ព្រិល​ទឹកក​កនា​រដូវត្រជាក់ទៅ​វិញ។ តើ​អ្វី​ទៅ​ដែល​ហៅថា​ “ស្រងេះស្រង៉ោច”​ នោះ?

ខួប​អាពាហ៍ពិពាហ៍​ពីរ​ឆ្នាំ 05/01/2018

Posted by ស្រុកខ្មែរ ស្នេហ៍ខ្ញុំ in រឿង​ផ្ទាល់​ខ្លួន.
add a comment

ថ្ងៃ​នេះ​កាល​ពី​ពីរ​ឆ្នាំ​មុន​ពួក​យើង​រៀបការ​ កាល​នោះ​មិន​ដឹង​ថា​ ស៊ូជីន​ នៅ​ទី​ណា​ទេ​ តែ​កូន​ស្រី​បាន​ចូល​មក​ក្នុង​ជីវិតរបស់​ពួក​យើង​ សំលេង​ហៅ​ “ប៉ាៗ​ ម៉ាក់ៗ”​ នៅ​ថ្ងៃ​នេះ​ពិរោះ​គួរ​អោយ​ចង់​ស្ដាប់។​

ការ​រស់នៅ​ដើម្បី​ខ្លួន​ឯង​ជា​ក្ដី​រីករាយ​មួយ​ដែល​យើង​ទទួល​បាន​ តែ​ពេល​នេះ​ទើប​ដឹង​ថា​ការ​រស់នៅ​ដើម្បី​មនុស្ស​ជុំវិញ​ខ្លួន​គឺជា​មួយ​លាន​ដង​នៃ​សុភមង្គល​ ”Being rich it is not how much you do have, it is how much you can give”។

25995064_1286668291479721_1692546374418716594_n

ចូរ​ស្រលាញ់​កូន​អ្នក​ ប្រពន្ធ​អ្នក​ គ្រួសារ​អ្នក​ អោយ​បាន​ច្រើន​ មនុស្ស​យើង​ម្នាក់​ៗ​មិនមាន​ពេល​សំរាប់​រស់នៅ​មួយ​ឆ្នាំ​ៗ​ចំនួន​មួយ​លាន​ដង​ទេ។​ នឹក​ឃើញ​កាល​នោះ​ពួក​យើង​បាន​ត្រឹម​មើល​ព្រះចន្ទ​ជាមួយ​គ្នា​ តែ​ក្រោម​ដំបូល​ផ្សេង​គ្នា​ ហើយ​ពេល​នេះ​ផ្សេង​ ដូច្នេះ​បាន​បង​ប្រាប់​អូ​នថា​ គ្មាន​ហេតុផលណា​មួយ​ ដែល​អាច​ឃាត់​​ខ្លួន​បង​មិន​អោយ​ញញឹម​បាន​នោះ​ឡើយ។

ថ្នម​អូន​មួយ​យប់​ទល់​ភ្លឺ 22/05/2016

Posted by ស្រុកខ្មែរ ស្នេហ៍ខ្ញុំ in កំណាព្យ​ភាសាខ្មែរ​, រឿង​ផ្ទាល់​ខ្លួន.
Tags: ,
add a comment

១-ចំរៀងមួយបទ បងធ្លាប់ច្រៀងបំពេរ លួងលោមស្នេហ៍ អោយអូនកេង ប្រលែងលេងតែពីរនាក់ វាយោរសែនត្រជាក់ សន្សើមក៏ធ្លាក់ផ្កាយរះព្រោងព្រាយ អនុស្សាវរីយ៍ ទុកជាទីពណ្ណរាយ ក្រោយពីយប់នេះហើយ អូនអើយយើងលែងឯការ។

២-កែវភ្នែកទាំងគូ សម្លឹងមើលមកបង អូនយកដៃអង្អែលខ្នង នួនល្អងខ្សឹបប្រាប់ថា នៅលើលោកាទោះយ៉ាងណា អូនមិនបង់បោះ ម្រាមដៃល្វត់ល្វន់ ល្អគន់គ្មានខ្ចោះ យកមកត្រដុសលើថ្ងាសបង ឱ! ស្នេហ៍ស្នងបងសែន កក់ក្ដៅម្ល៉េះទេ។

៣-សន្យា សន្យា សន្យាស្មោះស្នេហ៍ បើមានអ្នកប្រួលប្រែ សូមមេឃ និង ដី ជាសាក្សី កុំប្រណីមនុស្សក្បត់ អីឡូវបងជឿអូនហើយ ម្ចាស់ចិត្តត្រាណត្រើយ ផ្អែកខ្លួនអូនកើយនៅលើស្មាបង កេងទៅ កេងទៅ អូនកេងទៅ ចាំបងត្រកង កុំមានក្ដីសៅហ្មង បងនឹងនៅថ្នមថ្នាក់អូន មួយយប់ទល់ភ្លឺ។

រីករាយ​បុណ្យ​ណូអែល និង ចូលឆ្នាំ​សកល ២០១៥ 17/12/2014

Posted by ស្រុកខ្មែរ ស្នេហ៍ខ្ញុំ in កំសាន្ត​រូបភាព, រឿង​ផ្ទាល់​ខ្លួន.
Tags: ,
add a comment

ផ្ទាល់ខ្លួន៖ នឹក​ម្ហូប 07/11/2014

Posted by ស្រុកខ្មែរ ស្នេហ៍ខ្ញុំ in រឿង​ផ្ទាល់​ខ្លួន, សុភមង្គល.
Tags: ,
2 comments

តាម​ការ​ពិត​ទៅ​ម្ហូប​ទាំង​នេះ​ វាមិនមែន​ជា​ដើមកំណើត​របស់​ខ្មែរ​ ពី​ដំបូង​មក​នោះ​ទេ វា​ឡូកឡំ​គ្នា​ជាមួយ​ប្រទេស​ជិត​ខាង តែ​នៅ​ពេល​ដែល​យើង​កើត​មក ញ៉ាំ​ម្ហូប​អស់​ទាំង​នេះ​តាំង​ពី​ក្មេង​ជា​ប្រចាំ ដូច្នេះ​ម្ហូប​ទាំង​អស់​នេះ វា​ហាក់​ដូច​ជា​​ម្ហូប​ប្រចាំ​ភូមិ​ស្រុក ប្រចាំ​គ្រួសារ​ទៅ​ហើយ ដែល​យើង​តែងតែ​នឹក​រលឹក​ និង ឃ្លាន​ចង់​ញ៉ាំ ពិសេស​ពេល​ដែល​យើង​ចាកចេញ​ ឆ្ងាយ​ពី​គ្រួសារ យើង​តែងតែ​នឹក​រលឹក​វាជាប្រចាំ។ មើល​តាម​រូបភាព​អ្នក​ទាំង​អស់​គ្នា ដែល​ជា​ខ្មែរ​ដែល​ធ្លាប់​រស់នៅ​ក្នុង​ប្រទេស នឹង​មិន​ឃើញ​ប្លែក​ភ្នែក​នោះ​ទេ ព្រោះ​សុទ្ធ​តែ​ជា​ម្ហូប​ ដែល​ពួក​យើង​ឃើញ​ញឹកញាប់​ស្រាប់​មក​ហើយ។ សំរាប់​ខ្មែរ​ដែល​រស់នៅ​ប្រទេស​ផ្សេង​ៗ​ នៅ​ខាង​អឺរ៉ុប​ជាដើម ជា​ពិសេស​ប្រទេស​ដែល​មិន​សម្បូរ​ខ្មែរ​ច្រើន​រស់នៅ មាន​ការ​ពិបាក​ក្នុង​ការ​រក​ម្ហូប​ដូច​នេះ​ញ៉ាំ​ណាស់ ទោះ​ជា​ចង់​ចំណាយ​លុយ​ច្រើន​ក្ដី ហើយ​ទោះ​រក​បាន​ក៏​រសជាតិ​មិន​ដូច រសជាតិ​ដែល​ពួក​យើង​ធ្លាប់​ញ៉ាំ ក្នុង​ប្រទេស​យើង​ដែរ នេះ​ជា​ផ្នែក​មួយ​នៃ​ការ​លំបាក នៃ​ជីវិត​របស់​ខ្មែរ ដែល​រស់នៅ​ក្រៅ​ស្រុក។ ​​ 

(ច្រើន​ទៀត…)

ផ្ទាល់ខ្លួន៖ កំប៉ុង​ទឹកក្រូច 07/11/2014

Posted by ស្រុកខ្មែរ ស្នេហ៍ខ្ញុំ in រឿង​ផ្ទាល់​ខ្លួន.
Tags: ,
add a comment

កាល​ពី​ម្សិលមិញ នៅ​តាម​ផ្លូវ​មក​ផ្ទះ ពាក់​កណ្ដាល​យប់ ក្រោម​ផ្សែង​អាប់​ត្រជាក់​ដល់​ចុង​ជើង ខ្ញុំ​បាន​ដើរ​ប្រទះ​ឃើញ​កំប៉ុង​ទឹកក្រូច​​មួយ នៅ​នឹង​ដី​លើ​ផ្លូវ​មនុស្ស​ដើរ ខ្ញុំ​លើក​ជើង​ប្រុង​នឹង​ទាត់​វា​ តែ​ខ្ញុំ​បាន​ប្ដូរ​ចិត្ត​ខ្លួន​ឯង​វិញ ដោយ​ខ្ញុំ​អោន​រើស​វា​ ហើយ​យក​ទៅ​ដាក់​ក្នុង​ធុង​សម្រាម​ក្បែរ​នោះ ខ្ញុំ​មាន​អារម្មណ៍​ស្រស់​ស្រាយ ក្រោយ​ពី​បាន​ធ្វើ​វា ទោះ​មិន​មែន​ជា​ការងារ​ធ្ងន់ធ្ងរក្ដី តែ​ខ្ញុំ​កំពុង​បង្រៀន​ខ្លួន​ខ្ញុំ​ ធ្វើ​អំពើ​ល្អ​​​ តាំង​ពី​អំពើ​ល្អ​តូចតាច​ឡើង​ទៅ។ ចុះ​អ្នក​ទាំង​អស់​គ្នា​បាន​ធ្វើ​អំពើ​ល្អ​ខ្លះ​ទេ កាល​ពី​ម្សិលមិញ?

កំណាព្យ៖ យប់​មួយ​ក្រោម​ដើម​ស្រល់ 01/06/2014

Posted by ស្រុកខ្មែរ ស្នេហ៍ខ្ញុំ in កំណាព្យ​ភាសាខ្មែរ​, កំណាព្យ​របស់​ខ្ញុំ, រឿង​ផ្ទាល់​ខ្លួន.
Tags:
add a comment

បាន​ការ​ពារ: ផ្ទាល់ខ្លួន៖ ដល់​ផ្លូវ​បំបែក 30/05/2014

Posted by ស្រុកខ្មែរ ស្នេហ៍ខ្ញុំ in រឿង​ផ្ទាល់​ខ្លួន, ស្នេហា.
Tags: ,
បញ្ចូល ពាក្យសំងាត់ របស់អ្នក ដើម្បីមើល រាល់វិចារ។

មាតិកា​នេះ​ត្រូវ​បាន​ការពារ​ដោយ​ពាក្យ​សម្ងាត់។ ដើម្បី​មើល​វា សូម​បញ្ចូល​ពាក្យ​សម្ងាត់​នៅ​ខាង​ក្រោម៖

%d bloggers like this: